TURA: South West Khasi Hills a·jani Khonjoy jolrango lekka porani cholrang dongjaengani a·sel chatro chatrirang pilakni gitan tang·dopana man·jaenga ine A·chik Holistic Awakening Movement (AHAM) SWKH Zone parakatenba, ia jolrangona lekka poraniko tang·doatna gita dingtang dingtang cholrangko on·china a·dokni Education Minister Rakkam A Sangma-na sedoataha.
SWKH a·jani Khonjoy, Moheskola, Ranikor aro Puksora songrango auditorium aro Library-ko kulie on·china a·dok sorkariko didiatengon, ia songrangoba auditorium aro library-rangko kulie on·genchimode chatro chatrirang, an·tangtangni lekka pora baksana a·gilsakni gipin seng·anirangkoba skie ra·pana cholrangko man·gen ine AHAM SWKH Zone-ni president Crownbetter T Sangma patakataha.
Khonjoy Secondary School-ko Higher Secondary-ni gadangona ra·doatchina gitaba AHAM SWKH zone, a·dokni Education Minister-ko didiataha.
“Ia jolrango chubata gadangni lekka porako chatro chatrirang gipin biaprangona re·angna nanggija ra·pana man·na gita Khonjoy Secondary School-ko higher secondary school-ona ra·doatchina chinga mol·molenga,” ine Sangma parakataha.
Khonjoy aro Moheskola-o sorkari college-ko kulichina dabienggipani giminba AHAM SWKH zone, a·dok sorkarina gisik ra·attaianiko on·angaha.
AHAM SWKH zone-ni parakatani gitade, da·o dipet Khonjoy aro Moheskola jolrango sorkari college-rang dongkujani a·sel chatro chatrirang koros ong·e dingtang dingtang biaprangonasa re·ange poraina nangtokenga indiba ia biaprango sorkari college-ko kuliahaode ia jolni chatro chatrirangba koros ong·gija joltangon poraipana chol ong·gnokchim.
SWKH a·jani simarango donggipa chatro chatrirangna re·ruraani cholrangko on·china gitaba AHAM SWKH zone dabiangaha.
“SWKH a·jani simrango donggipa chatro chatrirang salantian kilometer 5-6-ni ramako ja·arangchisa skulona re·angna nangtokengani a·sel bang·en neng·nikanirangko chagrongna nangtokenga. Uni gimin ia jolrango donggipa chatro chatrirangna skul bus gita dakgipa re·a doani cholrangko on·china chinga mol·molenga,” ine Sangma parakataha.
Ia jolrango donggipa Garo medium primary skulrango Garo skigiparangko rakkichina gitaba AHAM SWKH zone, a·dok sorkariko didiataha.