SHILLONG: A·doko so·sojengjeng ong·anirangko dongjana gita sorkari, chu·onga gitan chel·chakanirangko dongen ine Bristibar salo, Meghalaya a·dokni Chief Minister Conrad K Sangma parakataha.
“A·doko maming so·sojengjeng ong·anirang dongjana gita chinga chu·onga gitan chel·chakanirangko dongen, uni gimin darangba jajrengna nangjawa,” ine Chief Minister, biap damsao election-na campaign ka·ani ja·man kobor ra·timgiparangna aganaha.
Nongmynsong-ni bilsi 52 ong·gipa Arjun Ray-ko so·otani bidingo janapatengon, iani bidingo police-rang, dos dakgipa manderangko rim·na sandiengaha aro niamde darangnan apsan ong·ani gimin sorkari, ia a·selni bidingo gisiko nangen kamko ka·enga ine Chief Minister parakataha.
“Sianggipa mandeni nokdangko anga mijal (Budbar) salo grongeaha aro an·tangni kalimpaaniko parakeaha. Chinga chingni man·a gita pilakkon daken ine anga uamangna ku·rachakaniko on·baaha aro uamang maiba neng·nikanirangko chagronggenchimode angna u·iatchina uamangko aganaha,” ine Sangma aganaha.
Hospital-o maming neng·nikanirang dongjachina gita hospital-ona SP-ko watataha ineba Chief Minister aganaha.
Chief Minister-ni parakatani gitade, Shillong aro gipin biaprango maming so·sojengjeng ong·anirang dongjana gita a·dokni DGP aro Chief Secretary tom·e chanchirimenba nanga gita ja·kurangko de·anggen.
“Banoba sipai dolrangko nanggenchimode chinga uandakgipa biaprango chel·chakgipa sipai dolrangko donatgen aro nanggenchimode ma·mongonikoba chinga sipai dolrangko okamatgen,” ine ua aganaha.
