SHILLONG: Manderangni vote-rangko tangka paisarangchi brena jotton ka·enga ine Congress dolni matnanganiko National People’s Party (NPP) jegalatenba, iandake matnanganirangko dakna skang sakkiko mesokchina dabiangaha.
“Ia pilakan napsrimangenggipa jahasko chodilenggipa mandeni matnanganirangsan ong·aia aro maming sakki aro pangchakani gri matnanganirangsan ong·aia,” ine NPP-ni ku·wattimgipa HM Shangpliang parakataha.
Iandake NPP-ni kosako matnanganiara kakket ong·ja ine talataniko on·angengon, “Uni iandake matnanganirangna sakkiko mesokchina anga Pala-ko aganenga,” ine Shangpliang parakataha.
NPP-ni dilgiparang, manderangni vote-rangko brena jotton ka·enga ine adita salrangna skangsan, Shillong Lok Sabha constituency-ni Congress candidate Vincent H Pala matnangatahachim.
Shillong Lok Sabha constituency-ni biap damsao election campaign ka·engmitingo manderangna aganprakangengon, Jaintia Hills-ona re·ange campaign ka·engmiting somoio, songantion 2000 vote-rangko NPP-na man·e on·genchimode manderangna dingtangmancha boksisko on·gen ine NPP-ni state president aro a·dokni Deputy Chief Minister Prestone Tynsong aganaha ine Pala matnangatahachim.
“Ian a·doko MDA sorkariko dilenggipa NPP-ni dilgiparangna namen kratcha·na nangani katta ong·a. Je songrangon manderang bang·batan Kristianrangsa ong·achim, uandakgipa songrango NPP tangka paisarangko on·na ku·rachakenga,” ine MPCC-ni president aro Shillong-ni Lok Sabha MP aganahachim.
