Ampati: Mijal Sonibar salo Ampati-o antio chang-sa cha·gipa bajar jatchio election-rango bakko ra·anirangko bilakbatatna aro puongiparangna skie on·a ‘‘Dul Doka’’ ine ming-gipa damarangko dokachi koborrangko gipatani A·chik jatni dakbewalko jakkale programme-ko ong·ataha.
Lok Sabha 2024-ni dal·-gipa Election ong·na mik-kango Systematic Voters Education aro Electoral Participation (SVEEP) campaign-ni bak gita South West Garo Hills, District Administration aro Tura-ni A·chik Theatre baksa Meghalaya CEO nangrime ong·atgipa ‘‘Dul Doka’’ chadambe aro bilsi re·ang-gimin ja·delgimin puongipa mande jinmarangko aroba bi·sarangko gisik nangat-beaha.
South West Garo Hills-ni Deputy Commissioner aro District Election Officer Hema Nayak chief guest ong·e programme-o bakko ra·ao 2024 April 19-o puonani salo puona ong·-kattokchina pilak puona chol ong·giparangko didie agangrikaha. Puongipa-rang saksakoba watchang-galjana gita polling booth-rangona re·na amgijagipa jemangan bilsi 85 ong·gipa ba una batgipa budepa buchumarangna aro PWD ba be·eno bilgri-jakgrigipa aro wheelchair-rango dongaigiparang puongipa-rang noktangon puona cholko man·aigen ine ua jinmana u·iataha. Re·ang-gipa changrangni election-rangoba puonanirango per centage bang·batgipa district ong·aniko janape ia changni Lok Sabha Election-de 100 per cent puonna district-ni puon-giparangko ua didiaha.
Ampati Degree College-ni Principal, Dr. Mamunur R. M. Willy uni jinma tom·ao aganao an·chingo jakpongni bil dongja indiba puona bil donga ine agane uamangni an·tangtangni mikkangchini namgnina puonaniara mongsonggipa ong·ani gimin ua aganaha. Puonani salara asonge dongna aro noko kusi ong·e rona chuttini sal ong·ja indiba Election-ni bil gnanggiparangni on·gipa cholrangko puongiparang dal·e ra·na nanga aro songni songpanggipa ong·a ine uamangni dakgniko chu·sokatna nanga, ua aganaha.
Ampati Govt Higher Secondary School-ni Principal, Jilpash R. Marak uni aganao jeon songpanggiparang uamangni an·tangtangni dilgipako seokna bil donga ua democracy-ni kamrangni namgniko agan-talate 2024 April 19-o puonchina aro puona ong·kattokchina pilak puona man·giparangko ua mol·molaha.
Program-o bakko ra·gipa gipinrangni gisepo SWGH-ni SDSEO in-charge Emphul Ch. Marak, Ampati Bazar Committee-ni memborrangko man·chape District official-rang bakko ra·angaha.
Salni progam-ni bak ong·e bakko ra·giparangna election-ni toreanirang bosturangko robol kal·giparang suale on·angaha.