SHILLONG: Shillong Parliamentary seat-o voter-rangni literacy rate bang·bata bidingo Lok Sabha election-ko chena uni jotton ka·anio chu·sokaniko man·a independent candidate Advocate Peter Challam political-ni bilakaniko mesokna ong·ataha.
“75%-ni gita skia poraia man·gipa manderang Shillong seat-o donga aro uamang uamangni gisik senggipa chanchiani baksa namgipa candidate-ko seokangna man·gen,” ine Sonibar salo Challam aganaha.
Ia aganchakaniko Shillong Lok Sabha seat-na susaenganio dal·dalgipa political name ong·atani kosako uni dakgrikanio sing·anina ua aganaha.
Mongsonggipa manderang baksa agangrikanganichi ua manderangona sokanganio aganangaha, “Da·ao ball manderangni court-o ong·enga, jedakode uamangni ma·sia aro nirikian baksa ia chango kakketgipa candidate-ko uamang seokna man·gen.”
Bilakani aro namgipa an·sengbalani baksa Parliament-o a·dokni dongkuenggipa mamlarangko ua ku·rang on·angna nangnikenga ine ua aganaha.
Uni parakatani gitade, Inner Line Permit (ILP)-ko ra·bana aro Constitution of India-o Eight Scheduled-o Khasi ku·sikko chanchapna aro a·dokni sima ari bak dakanio mitam mamlarangko jean batanggimin ruuta bilsirangna da·onaba donchipkuaienggipako dabianggen.
Iarangna agreba, nangchongmotgipa sana banani, education, kam gri donggiparangni bidingo, rama jalang tariani, a·dokni songdonggipa sakantina naljokani aro chel·chakaniko on·a, iarangko campaign ka·ani somoio agan-talatangaha.
“Shillong parliamentary seat-ni ning·o ge-36 legislative assembly constituency-rang donga aro ian ong·telaigipa man·e cha·begipa ong·a aro itihas ong·a aro national politic-o bilake mesokangna iano nangenga, uni gimin agana Shillong parliamentary seat-ni ku·rangko mikkangchina ra·angna nangnikenga,” ine ua aganaha.
Constituency seat-ni manderangni gita sana banani, poraia skiani aro kam gri ong·anio neng·nikaniko chagronggipa aro mamlarangko aganna ua nangnikenga ine ua aganaha.
“Manderang saksa sakgipinrango jaksi otarangko aro chonikanirangko dontongna nanga aro a·doko ong·enggipa mamlarangni bidingo nangchongmotakosa agangrikangna nanga,” ine ua aganaha.
