SHILLONG: Parliament-o meligrikgijanirang ong·gni-gipa mamlarangko niamchi dakgrikna saksakosan nangenggipana niamko u·i-ma·sigipa aro gimikkon namedake ma·siani dong-gipa MP-ko nangenga ine United Democratic Party (UDP) mijalo aganaha.
“Nangni somaio gimikni gitan aro niamko namedake u·i-ma·siani donggipa MP-ko nangenga aro UDP ukon on·enga. Parliament-o meligrikgijanirang donggen uarangko warachakna niamko ma·sigipakosan nangenga,” UDP vice president Allantry F Dkhar aganaha.
RDA candedate-ni bidingo poll prospect-rangni aro da·o campaign ka·enggipani bidingo aganao, “Puonani ong·na skang dingtangmancha jensalo ra·gatgipa sixth schedule-ko bilakbatatna aro songpanggipa mande-rangko chel·chakna soka manderangni namgnina mamlarangko chinga ra·-baaha,” Allantry aganaha.
Khasi-Jaintia Hills-ni bang·a biaprango party da·o damgni public meeting-rangko ka·ako u·iatao chang brioni changsniona salantian public meeting-rangko chinga ka·enga ine ua aganaha.
“Manderangni agan-chakanirang gisik ka·tongo nangenga. Jeon chingo MLA-rang ba MDC-rang dongja neng·nikanirang aro candidate-rangni chan-chianirango pangchake ra·chakna man·anirang constituency-rangna rama-ko tarianiba ong·enga,” ua agandapaha.
Nisan ka·gipa a·jolrang-ni bidingo sing·ao, ‘‘Nisan ka·anio indakgipa ding-tangmancha a·jolrang dongja ge·sni district gimikon chinga apsan nisan ka·aia indiba MLA-rang aro MDC-rangchi dilenggipa constituency-rango dingtangmancha nisanko donenga. Chinga social media-o ong·naba bate a·bachenggipa gadangrangni gimin nisan donbatenga”, ua aganaha.
“Pilak seokako man·gipa dilrang aro party-ni dilgiparang uamangni bil ama gita nambatako dakna jotton ka·enga aro June 4-o cheaniona chinga ka·dongenga,’’ ua aganaha.
UDP aro HSPDP, Shillong parliamentary seat-na Reginal Democratic Alliance (RDA)-ni ning·o Robert June Kharjarin-ko chakatatenga.
