SHILLONG: Adita salrangna skang, Mawlai Mawroh-o nok rikenggipa mande saksako so·otanio jak donggipa manderangko police-rang rim·na man·kujaenga.
Re·anggipa antini Budbar salo, Mawlai Mawroh-o nok rikenggipa mande sakgittamko mikkang katipgipa manderang chadrapeahachim aro chadrapako man·e uamangoni bilsi 52 ong·gipa Arjun Ray-de Shillong songjinmani NEIGRIHMS-ona sanna ra·angani ja·man siangna gita nangaiahachim.
Ia sakgittamoni gipin sakgni manderang, Rajaram Mahato aro Suresh Kumar Mahato-ba doka satako man·e adita saknaanirangko man·tokahachim.
Ia a·selni bidingo sing·sandiaton, da·o dipet police-rang darangkoba rim·kujaenga indiba adita sakkirangkode man·engaha ine police-rang parakataha.
Iana skang, March jani 27 tarikoba, Citizenship Amendment Act (CAA)-ko jegale dingtang dingtang dolrangni Ichamati-o jinma re·jomaniko ong·atani ja·man, gipin jat mande sakgnikoba ma·sina man·gijagipa manderang so·ote galahachim aro ia a·selni bidingo police-rang, KSU-ni membor sakgniko rim·ahachim.
Indake ong·engon, a·dokni dingtang dingtang biaprango, mongsongbate Khasi Hills a·jao iandakgipa a·selrangko nikna man·rongengani gimin a·dokni BJP dol suk ong·gijaniko parakataha aro a·doko niam retirangko bilakbate jako ra·na gita NPP-chi dilenggipa MDA sorkariko didina a·dokni Cabinet Minister aro BJP-ni dilgipa AL Hek-ko didiataha.
Meghalaya a·doko darang jat aro toromni kosako iandakgipa a·selrangko on·na on·jawa ine Hek parakataha.
“Khasi-ba ong·china ba gipin jatrangba ong·china chinga BJP-ni gita pilaknan kakket bichalko on·na jotton ka·gen,” ine Hek, Oakland-o BJP-ni tom·aniko ong·atanio aganaha.
East Khasi Hills a·jani Shillong aro Ichamati-o iandakgipa so·sojengjeng ong·anirangko nikna man·ahani gimin Sonibar salo, 167 Battalion BSF, Meghalaya Police baksa dingtang dingtang gittimrango re·jomaniko dakangskaaha.
BSF aro police-rangni re·jomaniko, Dhanketi, Laitumkhrah, Goraline, Nongrim Hills, Nongshilliang, Rynjah Market, Lapalang, RR Colony aro Pohkseh gita ong·ataha.
Ia km 20 ong·gipa re·jomaniko Sonibar pring 8:00 bajioni SDPO Sadar Ashish aro Jyoti Wahlang dilangaha.