SHILLONG: April-ni 19 tariko ong·atenggipa Lok Sabha election-na kamrangko ka·samsoanio National People’s Party (NPP) aro Voice of the People’s Party (VPP)-ni gisepo matnanggrikani aro nanggrikanirangko nikna man·engon, gipin political dolrangni campaign ka·anirangko golmal ka·jachina aro namgipa bewalrangko party worker-rangna skie on·china gita VPP-ni dilgiparangko NPP didiataha.
NPP-ni ku·wattimgipa HM Shangpliang-ni parakatani gitade, election-rangko ong·atanio political dolantian an·tangtangni miksonganirangkosa manderangna u·iatna jotton ka·rongachim indiba ia Lok Sabha election-ode badiaba political dolrang, gipin dolrangni tom·anirangko golmal ka·na aro so·sojengjeng ong·atna jotton ka·anirangko nikna man·skaahachim.
Dingtang dingtang dolrangni campaign ka·anirangko tom·tome ong·atchina gita election official-rang u·iataniko on·manaha ine janapatengon, party-ni manderangna namgipa bewalrangko skie on·china Shangpliang, VPP-ni dilgiparangko didiataha.
“Chingaba party ong·e gipin dolrangko mande ra·a aro apsan daken gipinrangkoba chingko mande ra·aniko nangnikskaa indiba da·o dipet iandake ong·kujaenga. NPP-ni tom·a changantian VPP-ni manderang re·bae tom·anirangko golmal ka·na jotton ka·rongenga,” ine Shangpliang aganaha.
Election Commission-ni dongimin niamrangni bidingo janapatengon, VPP dolara skia man·giparang aro skie on·giparangni party-sa ong·ani gimin VPP-ni dilgiparang, party worker-rangnaba namgipa gunrangko skie on·skana nanga ine NPP-ni ku·wattimgipa parakataha.
