SHILLONG: BJP-ni election manifesto-o Uniform Civil Code (UCC)-ko ra·gatna ku·rachakaniko on·ahaoba Meghalaya a·dokode UCC-ko National People’s Party (NPP) raken jegalaigen ine NPP-ni state president aro a·dokni Deputy Chief Minister Prestone Tynsong parakataha.
Mawthadraishan-o NPP-ni election-na tom·aniko ong·atanio jinmana aganprakangengon, Meghalaya a·dokni Lok Sabha seat damgnion NPP-na BJP chakpaaniko on·engani gimin UCC-ko ra·gatanio NPP-ba chakpaaniko on·aigen ine mitam political dolrang, manderangko dilsretna jotton ka·naba gnang indiba Meghalaya a·doko UCC-ko ra·gatna gita NPP raken jegalaigen ine Tynsong parakataha.
“2018 bilsionin chinga UCC-ko jegalengaha aro Assembly-ni Budget Session-oba chinga UCC-ko jegalna gita parakmanaha,” ine Deputy CM aganaha.
Tynsong-ni aganani gitade, Citizenship Amendment Bill (CAB)-ko jegalanioba NPP, a·dokni aro salgro salaram jolni dingtang dingtang political dolrangko aro NGO-rangko dilahachim.
Ua somoio CAB-ko jegalna gita NPP-ni national president Conrad K Sangma-sa salgro salaramni dingtang dingtang dolrangko, Prime Minister Narendra Modi baksana Union Home Minister Amit Shah-koba grongdileahachim ineba ua aganaha.
“Meghalaya a·dokni damgittam autonomous district council (ADC)-rangni ning·o CAA-ko watchina gita chinga Prime Minister aro Home Minister-ko didina man·aha,” ine Deputy CM aganaha.
Shillong parliamentary constituency-o NPP-ni candidate Ampareen Lyngdoh-ko seokgenchimode Inner Line Permit (ILP), Khasi aro Garo ku·sikrangko Eighth Schedule-o chapatna aro uandakgipa dingtang dingtang dabianirangko ma·mong sorkari baksa agangrikna man·gen ineba ua aganaha.
