SHILLONG: Myanmar a·songni gue gran (supari)-rangko Bangladesh a·song gita India a·songona niam gri badingsrukbaanirang batroroengon, adita salrangna skang BSF Meghalaya Frontier aro Meghalaya Police-ni sipairang, South Garo Hills a·jani simao bang·bea gue granrangko rim·na man·taiaha.
Niam gri gue badingenggiparangni bidingo koborko man·soani ja·man 200 Battalion BSF-ni sipairang, Meghalaya Police baksa nangrime, India aro Bangladesh a·songni simarango am·sandianirangko dakeaha aro am·sandianirangko dakon, a·song damgnini sima sambao donggipa nok te·saoniko gong lak 14-na batgipa kg 4900 gue granrangko rim·na man·aha.
Ia gue granrangko ja·mano Rongara Police Station-na pakwate on·ataha.
Myanmar a·songoniko Bangladesh a·song gita guerangko niam gri badingsrukbaengani a·sel Garo Hills-o aro a·dokni pilak biaprangoba da·o gueni damrang komiangenba gue bagan bari dake cha·enggipa bang·en noksan ong·na gita nangtokengachim ine nikna man·a.
Koborko on·ani gitade, Myanmar a·songoniko Bangladesh a·song gita niam gri gue ra·baengani a·selan da·alo gue bag-sani dam gong 2000/-ona tang·onangaha aro gue bagan bari dake cha·enggiparang namen noksan ong·atako man·na nangtokengahachim.
Lok Sabha election-na campaign ka·engmiting somoio pilak dolrangan, niam gri gue badinganichi gue bagan dake cha·enggipa manderangna noksan ong·na nangengani gimin ku·rangko on·tokengoba iani bidingo National People’s Party (NPP)-ni president aro a·dokni Chief Minister Conrad K Sangma-de maming ku·rang on·anirang dongskajaengani gimin Garo Hills-o gue bagan dake cha·enggipa bang·a manderangan sing·doattokahachim.
“Niam gri gipin a·songoniko gue badingsrukbaengani gimin Congress, TMC aro Independent candidate-ba ku·rang on·enga indiba NPP aro NPP-ni minister-rangde iani bidingo jrip dongtokaienga. Chief Minister an·tangan Garo Hills gimikchin re·roroe an·tangni nokgipa Agatha Sangma-na campaign ka·engachim indiba gue bagan dake cha·enggipa manderangni dukni giminde katta mingsakoba janapa dongja,” ine North Garo Hills a·jani saksa dilgipa Panseng B Marak matnangatahachim.