SHILLONG: Khasi Hills Autonomous District Council (KHADC)-ni chief executive membor (CEM) ong·engmiting somoio tangka paisarangko jakkalsreta ine Voice of the People’s Party (VPP)-ni president Ardent Miller Basaiawmoit-ko matnangahani gimin KHADC-ni MDC Donkupar Sumer-ni kosako VPP-ni changgni dake FIR ka·gipani bidingo police-rang, kacharina sedoatskaaha.
Ian ‘chonnikani’ case ong·ani gimin iani bidingo mokordoma ka·na gita kacharini permission-ko bi·atchengaha ine Bristibar salo police-rang parakataha.
“VPP-ni defamation case-na FIR ka·aniara warrant gride rim·na man·gijagipa case-sa ong·a aro kacharini permission-ko man·soahaosa chinga mokordoma ka·na man·gen,” ine Police officer saksa parakataha.
FIR-ko VPP-ni president, re·anggipa April 15 tariko ka·ahachim aro uni FIR-o parakani gitade, adita salrangna skang NPP-ni tom·aniko ong·atanio KHADC-ni MDC Donkupar Sumer, gong lak 30 tangkarangko jakkalsretaha aro KHADC-o kam ka·enggipa Khasirangko ra·galaha ine matnangahachim.
“Iandake matnanganirangara kakket ong·ja aro pangchakani grigipasan ong·aia,” ine VPP-ni president, FIR-o janapatahachim.
Sumer-ni agangipa kattarangko YouTube-ni T7 news channel-oniko nikna man·gen ine talataniko on·angengon, “Uni iandakgipa kattarangko agananichi Meghalaya Legislative Assembly-ni saksa membor-ko skatang matnangani gita ong·aha,” ine Basaiawmoit parakataha.
Ia apsan obostani bidingon VPP media cell-ni membor Rusievan Shangpliang-ba MDC-ni kosako Sadar police station-na FIR ka·doangahachim.
Indake ong·engon, KHADC-ni MDC Sumer-ba Budbar salo, VPP president-ni kosako, cha·uani, manderangko togiani aro tangka paisarangko jakkalsreta ine police-rangna FIR ka·doangskaaha.