TURA: Lok Sabha election-o susaenggipa candidate-rangni Winter Capital-ko minge, an·tangtangko seokchina didianiko A·chik Conscious Holistically Integrated Krima (ACHIK) dol raken jegalataha.
Tura parliamentary constituency-o NPP, INC, TMC aro Independent candidate saksa susaengachim ine nikna man·a.
Iani bidingo kobor ra·timgiparangna parakatengon, “Lok Sabha election-o Winter Capital-ko biming minge vote gilamaniara kraani ong·jaengani gimin chinga iako raken jegalatenga. Tura-ko Winter Capital songchina dabianiara saksa dilgipani dabiani ong·ja indiba Garo Hills gimikni dabianisa ong·enga aro somoi sokahaon Winter Capital-ni bidingo ACHIK, sorkari baksa agangriktaigen,” ine ACHIK-ni general secretary Jack Sangma parakataha.
Winter Capital-na dabiani bidingo ACHIK dolni a·dok sorkari baksa agangriktaina manchianian Tura-ko Winter Capital ong·atna nangnikaniko mesokani ong·enga ineba ua aganaha.
“Tura-ko Winter Capital songchina gita Garo Hills-o songdongenggipa manderangni nangnikaniko chu·sokgipa ong·atna ACHIK, a·dok sorkari baksa nama bewalo agangrikangkugen,” ine ACHIK dolni general secretary parakataha.
