A·dokni pilak biaprangon Lok Sabha election tom·tome matchotanga
SHILLONG/TURA: Meghalaya a·dok gimiko Lok Sabha election-na pu·onani da·o dipet 69.91 percent ong·aha ine Sukrobar attamo, a·dokni Chief Electoral Officer (CEO) BDR Tiwari parakataha.
CEO-ni parakatani gitade, da·o dipet Shillong Parliamentary constituency-o pu·onani 70.26 percent aro Tura Parliamentary constituency-o 69.39 percent ong·skaaha.
Meghalaya a·dokni pilak biaprangon election-ko ong·atanio maming golmal ba so·sojengjeng ong·anirangko knasona man·jaha ineba Tiwari parakataha.
Pu·onaniko a·bachengatna skang ‘mock poll’-ko dakanio adita electronic voting machine (EVM)-rang name kam ka·jahani gimin te·srena gita nangaha ineba CEO aganaha.
CEO-ni parakatani gitade, ‘Mock poll’-ko dakanio ge 26 Ballot unit (BU), ge 32 control unit (CU) aro ge 64 VVPAT-ko te·srena gita nangaha aro pu·onani somoioba ge 21 BU, ge 22 CU aro ge 55 VVPAT-ko te·srena nangaha.
Indake ong·engon, da·o dipet a·doko gimiko pu·onani 69.91 percent-san ong·kuengani gimin 2019 bilsini Lok Sabha election-o manderangni pu·onana bate komibatenga ine nikna man·skaaha. 2019 bilsini Lok Sabha election-ode Meghalaya a·doko manderangni pu·onani 81.38 percent ong·ahachim ine nikna man·a.
Indake ong·genchimoba, bang·bata polling party-rangan, mongsongbate chel·a biaprango kam ka·giparang waltingosa sokbana ka·dongsoengani gimin pu·onani percentage batangkunaba gnang ine ka·dongsona man·enga.
Ia chang Lok Sabha election-o a·dokni Lok Sabha constituency damgnion dingtang dingtang political dolrang aro candidate-rangni bilakbee susagrikaniko nikna man·ahachim.
Shillong-o NPP, Congress, RDA, VPP aro Independent candidate-rang susagrikengon, Tura Lok Sabha seat-o NPP, Congress, TMC aro Independent candidate saksa susagrikskaengachim.
Ia koborko seatengmiting somoiona kingkingde South West Garo Hills a·jao manderangni pu·onani 82 percent ong·e, Tura parliamentary constituency-o bang·batgipa ong·enga aro South Tura-o 55 percent-san ong·e komibate pu·ongipa ong·skaenga.
