TURA: Lok Sabha election-na skang, Congress dolni candidate Saleng A Sangma-ni jongsarigipa, jean be·enni gita cholgri ong·achim, ia me·a bi·sani gitoko NPP-ni ba·rako wenenba ‘ua NPP-na pu·ongen’ ine aganatna jotton ka·ahani gimin NPP-ni membor Kritenbirth Marak-ni kamko Nengminja Mahari raken jegalataha.
Iani bidingo NPP-ni membor-ko jegalatengon, “NPP-ni dilgipa Kritenbirth, ong·sibatgipa politics-ko kal·enga ine chinga kobor man·soaha. Be·enni gita cholgri ong·gipa bi·sa Milam N Sangma-ni gitoko NPP-ni ba·rako wenenba ‘ua sana pu·ongen’ ine sing·e an·tangan NPP-na pu·ongen ine aganenba ia video-ko ua social media-o watataha. Uni gimin ia mandeni kamko chinga raken jegalenga,” ine Nengminja Mahari Association-ni vice president Vicky Rose N Sangma parakataha.
Kal·ake roako man·gipa Milam Sangma-ra Saleng-ni gitcham jikgipani jonggipa ong·achim aro ia obostani video-ko social media-rango niksoani ja·man Nengminja Maharisan ong·aigija Garo Hills-ni bang·bata biaprangon manderang, NPP-ko dilgipa mandeni kamko jegalattokaha.
“Milam-de saksa be·enni gita cholgri ong·pagipa bi·sasa ong·e Kriten-ni daka kamrangko ma·sisokpaja, uni gimin chinga All Garo Hills Nengminja Chra Association-ni gita uni kamrangko raken jegalenga. Milam-o aro Nengminja Mahari gimiko Kriten-ni kema bi·anikoba chinga nangnikenga. Ua kema bi·jagenchimode aino pangchake ja·kurangko de·anggen,” ine Sangma parakataha.