SHILLONG: Shillong songjinmao, bilsi 13 ong·gipa me·a bi·sa saksa re·anggipa April 14 tarik pringo ‘morning walk’ ka·na re·angaonin gimaenga ine kobor on·aha.
Iani bidingo gimaenggipa me·a bi·sani ma·a paa, Madanriting Police Station-o FIR ka·aha.
FIR-o janapani gitade, ia me·a bi·sa jekon Shivan Kumar Ray mingachim, April-ni 14 tarik pring 6:00 bajimangon, nokni manderangna agangija ja·achi roramna re·angahachim.
Ua nokona re·bapiljahaon, nokni manderang uko sandiangahachim indiba uko man·piljaha.
Ia me·a bi·sani an·gil sakgisima, feet 4-mang ong·e changroa, be·en ram·a, uni jakasi petopo me·mang su·tota donga, kni kan·dika aro Hindi, English aro Bihari ku·sikrangko aganna man·a ine nokni manderang u·iataha.
Uni nokoni ong·katangani somoio ua jacket gitchak, jeans aro jutta gisimko ganachim ineba u·iataha.