SHILLONG: Shillong Lok Sabha constituency-o National People’s Party (NPP)-ni candidate Ampareen Lyngdoh-ko seokjaha ong·ode Khasi aro Jaintia Hills a·jarango songdongenggipa manderangni dal·bea gualani ong·gnok ine Sukrobar salo, BJP-ni dilgipa aro South Shillong-ni MLA Sanbor Shullai parakataha.
Sukrobar salo, an·tangni vote-ko on·angani ja·man kobor ra·timgipa manderang baksa agangrikengon, 2019 bilsini Lok Sabha election-oba da·o ong·enggipa Shillong-ni MP-ko seoke bang·a manderangan suk ong·tokjaha ine Shullai aganaha.
Ma·mongo BJP-chi dilenggipa NDA sorkari baksa bakrimenggipa candidate-ko ia changoba manderang seoktaijagenchimode manderang apsan daken duk ong·taina nanggen ineba ua aganaha.
BJP MLA-ni aganani gitade, NPP aro BJP dolrangni chakenggipa candidate-rangko seokgenchimode Khasi aro Jaintia Hills a·jarangoba bang·en namroro silroroaniko man·e manderangna namgni ong·gen.
“NPP-ni candidate Ampareen Lyngdoh seokako man·genchimode Union Cabinet-ni bak ong·telgen ine anga ka·dongenga,” ine Shullai aganaha.
Meghalaya a·doko BJP-ni susagija NPP-ni candidate-rangna chakpaaniko on·ahani gimin janapattaiengon, iani bidingo BJP-ni dilgiparang, party-na kam ka·giparangna talate on·na man·aha ine Shullai parakataha.
“Ma·mong aro a·dokoba BJP aro NPP-ara bakrimgipa dolrang ong·a ine an·ching ma·sina nanga. Tripura aro Assam a·dokrangoba chinga apsan daken candidate-rangko susaataha,” ine ua aganaha.