SHILLONG: De·e ra·bagipa two-lane Shillong Western Bypass, rama-sorokrangko tarina nangdapgipa a·arangna uamangna on·gipa tangka-paisana suk ong·gija a·a nokgiparangni chu·ongnikjani ja·mano bon·chongdikkuenga.
Skanggipao 44 per cent tangkarangko on·aha, gnigipa aro gittamgipa bako 80 per cent aro 60 per cent dingtang dingtang dake suale on·angaha ine National Highways aro Infrastructure Development Corporation Limited (NHIDCL)-ni official saksa u·iataha.
A·bachengao adita sak a·a nokgiparang, bilsignimangna skango jinmana knatmitingo gong kror 1.200-mang tangkako uamangna on·a sorkari ku·rachakahachim indiba ia bilsini February 20-o sorkari uamangna gong 681.62 kror-kosan on·aiaha ine uamang aganaha.
A·dokni kajinani mamla ong·enga aro iako a·dok sorkari chanchina nanggen ine official aganaha.
“A·bachenggipa bakoni 38.256-km bakrogipa Shillong Western Bypass Lad Umsaw sepang aro Lad Mawreng-o najokegipa ong·a,” ua aganaha.
Synjuk Ki Rangbah Shnong-ni ning·o a·a nokgiparang uamangni a·ako deputy commissioner-rangni a·bachengao tik ka·gimin damo on·a gita namnikaha ine a·bachengao Deputy Chief Minister Prestone Tynsong aganaha.
Meghalaya neng·nikanirangko chagrongaha maina a·ani tangka gimik gimang gong kror 1,200 ong·na ka·dongsoengachim, project-ni gimik gimang dam km 30-33 ramana gong kror 650 mota-moti ong·achim, ua aganaha.
