TURA: Adita salrangna skang, East Garo Hills a·jani Rongmil jolo donggipa buring damsao, Assam-ni mande sakgittamko so·otenba gope galangko police-rangni man·ani ja·man da·o Assam-o ding·chaoanirangko nikna man·engani gimin maming dal·a a·selrang ba so·sojengjeng ong·anirang dongjana gita ia mande sakgittamko so·ote galanio jak donggipa manderangko ta·raken rim·enba nanga gita sastirangko on·china Garo Hills-ni social activist Cherian Momin didiataha.
East Garo Hills a·jani SP SA Rynjah-ni u·iatani gitade, bilsi 35 ong·gipa Jamor Ali, uni driver Noor Ahmed aro bilsi 25 ong·gipa Zahidul Islam, re·anggipa April-ni 25 tarikon, Meghalaya a·doko kam nangchongmota dongani gimin re·baenga ine noko aganbaahachim. April-ni 16 tarik pring 6:30 bajimango, uamang Garo Hills-ni buring dakgipa biapo cha ringenga ine Jamor Ali, nokni manderangna phone ka·e aganataha indiba uni ja·mande uamangni phone switched off ong·aiaha aro uamangna uamangni nokni manderang phone ka·oba man·taijaha.
Uamangni gimaenggipa gariko, Rongjeng police station-ni ning·o donggipa Rogu Alda songona dakanggipa ramani buringo, kamgiminkosa ja·mano police-rang man·ahachim. Gari man·gipa biap sambarangoniko police-rang am·sandiangkuon, gopdaldal gopramkoba nikeaha aro ia gopramrangko cho·e nion, ia mande sakgittamni kamgimin manggisirangko police-rang man·aha ineba SP u·iataha.
Indake ong·engon, ia mande sakgittamko iandake ka·saninggija dake so·ote galahani gimin so·ota man·gipa manderangni ma·drangrang, ia a·selni bidingo Assam aro Meghalaya a·dok damgnini chief minister-rangnan u·iatenba, dos dakgipa manderangko ta·rake rim·china didiattokaha.
Ia manderangko ka·saninggija dake so·ote galani gimin Assam-o manderangni ding·chaoaniko nikskana gita man·engahachim aro iani bidingo dos dakgipa manderangko ta·raken rim·china aro niamo pangchake sastirangko on·china Momin didiataha.
A·dok damgnini gisepo maming so·sojengjeng ong·anirang dongjana gita tom·tomaniko rakkiangkuchinaba ua a·dok damgnini manderangko didiataha.
