SHILLONG: Ia chang Lok Sabha election-o susagrikanirang namen rakbegipa ong·ahaoba Tura Lok Sabha seat-ko bang·gija vote-rangchi chegen ine National People’s Party (NPP) ka·dongkuenga.
Shillong Lok Sabha seat-ko cheani giminde NPP-ni dilgiparang mamingkoba janapjaha indiba Shillong-oba uamang bilaken susaaha inesa a·kangatskaaha.
NPP-ni working president aro a·dokni Cabinet Minister Marcuise N Marak-ni parakatani gitade, Tura Lok Sabha election-ni bidingo hisaptaie nion, NPP-ni Agatha K Sangma aro Congress dolni Saleng A Sangma-ni gisepo susagrikani apsangrik ong·aha.
“Tura-o NPP aro Congress dolni gisepo bilaken susagrikaha ine anga ku·rachakenga. Bon·kamgipa somoio toromni gita gisikni dilanirangko manderang man·aha indiba chinga bang·gija vote-rangchi chena ka·dongenga,” ine Marak aganaha.
Garo Hills-o Congress dolde inditana bilakgipa ong·jaha ine janapatengon, toromni gita gisikni dilani aro Trinamool Congress (TMC)-ni vote-rang pripraahani a·sel NPP aro Congress dolni gisepo susagrikani ong·aha ine NPP-ni dilgipa parakataha.
TMC-na chakgipa manderang bon·kamgipa somoio Congress-ona katnapaha ineba ua aganaha.
Marak-ni aganani gitade, NPP-na BJP chakpaaniko on·ahani a·sel toromni gita gisikni dilanirangko manderang man·aha aro ian NPP-na nangchakeaniko ra·baaha.
“NPP aro BJP-ni gisepo bakrimanisan ong·aia aro BJP-o napenga ong·ja ine chinga manderangna talatna jotton ka·ahachim. BJP-ni miksongani aro bebera·aniba dingtang donga aro NPP-niba dingtang donga, Sorkariko chalainasa chinga bakrimahachim,” ine NPP-ni working president parakataha.
TMC-ni bidingo janapatskaengon, ia election-o TMC, re·anggipa bilsini Assembly election-o man·rika gitaba vote-rangko man·jawa maina Garo Hills-o TMC-ko manderang ra·chakna man·kujawa ine Marak parakataha.
Shillong Lok Sabha constituency-ni bidingo janapatengon, Shillong-oba NPP chena gita rakbeen kamrangko ka·aha ine NPP-ni sakgipin working president Hamletson Dohling parakatskaaha.
“Politics-ode hisapanirang basakobade ong·aia aro basakobade ong·ja indiba chinga bilaken susaaha. Shillong Lok Sabha constituency-ni ning·o donggipa pilak dam 36 Assembly constituency-rangon NPP-ni candidate-ko cheatna gita party worker-rang rakbee kamko ka·aha. Chinga kraa gitan vote-rangko man·nade ka·dongenga,” ine Dohling aganaha.
Dohling-ni aganani gitade Shillong Lok Sabha constituency-o Congress, NPP aro Voice of the People’s Party (VPP) dolrangni gisepo bilakbate susagrikaha.