SHILLONG: Voice of the People Party (VPP), Shillong Lok Sabha seat-ko chena ka·dongengnaba donga, indiba Congress-ba uamangni ka·donganiko watgaljaenga, unbaksana Congress ia seat-ko altuaen man·pilgen ineba aganaha.
Indake Shillong Parliamentary seat-na susaanio Congress-an mongsonggipa ong·enga ine Mawhati-ni Congress MLA, Charles Marngar Mongolbaro ka·dongbee aganaha.
Congress-na badia dol rakbatgipa ong·enga ingipa sing·aninade Marngar aganna jechakaha aro da·o dipetode party gimik polling station-rangoni koborko man·tokkuja inesan aganchakaha.
Maderang, da·oni Congress MP, Vincent H Pala-on ka·dongna man·tokenga maina Delhio BJP-ko dakgriknagipa Congress-san ine manderang u·iatoka, ua aganaha.
Marngar indakeba aganaha je bang·a namgni ong·gipa koborrangko man·soenga, maina sriksrik Congress-na chakpae vote puongiparang donga.
