TURA: Garo Hills-o ding·ani 46 degree Celsius-ona kingking tang·doani cholrang donga ine Indian Meteorological Department (IMD)-oni u·iataniko on·angani ja·man, mikkangchi iandake ding·ani batroroangjana gita samtangtango ong·telaigiparangko ripinge rakkina nangengahani gimin Centre for Environment Protection & Rural Development (CEPARD) dolni gita mikrakataniko on·angskaaha.
“An·chingni samtangtango ong·telaigiparang ta·raken dingtangahani a·sel manderangni janggi tanganio nangchakeaniko man·na a·bachengengaha aro bang·a manderangni gisepon an·gil naritchekanirang, gusuanirang, be·en ding·petpete saanirang aro uandakgipa sabisi sakanchirangkoba man·tokengaha. Garo Hills-o obostarang namjabatroroengaha aro an·seng baljokanina simsakbatna nangengaha,” ine CEPARD-ni president Samgar R Sangma parakataha.
Sangma-ni parakatani gitade, niam gri ro·ong bikotanirang batrorobaenganichi, bol wa·arangko skatang den·enganichi aro chiring chibisikrangko nosto ka·ani a·selan da·alo ding·anirangba batroroengahachim.
Shyamnagar jolrango Jal Jeevan Mission (JJM)-ni kamrang chu·sokgipa ong·jaenga ine an·tangni suk ong·gijaniko parakatskaengon, JJM-ni kamrangko name ka·jaengani a·selan manderang chirangko da·o man·tokjaengaha ine CEPARD-ni president parakataha.
“Rongtalgipa ringani chirangko man·jaengani a·sel manderangni an·seng baljokanio nangchakeanirangko man·engaha, uni gimin iani bidingo sorkari ta·raken ja·kurangko de·na nangenga,” ine Sangma parakataha.
Garo Hills-o ding·ani batroroenganiko champengna aro china dilaniko komiatna gita dingtang dingtang sorkari department-rangko, dingtang dingtang dolrangko aro songsalni manderangko ku·cholsan kam ka·china gitaba CEPARD-ni president didiataha.
