TURA: Adita salrangna skang, South West Garo Hills a·jani Garobadha samba jolo donggipa Gandhipara songo Chenga Benga Mela-ona re·anggipa me·chik bi·sa sakgniko drae til·ekgipani bidingo see u·iatani ja·man Assam a·dokni Chief Minister Himanta Biswa Sarma aro Assam-ni Police department, dos dakgipa manderangko rim·e on·na ku·rachakaniko on·ataha ine Bristibar salo, Tura-ni MDC aro BJP-ni state vice president Bernard N Marak parakataha.
Ia a·selni bidingo police-rang, adita salrangna skangsan Meghalaya a·dokni sakgni aro Assam a·dokni mande sakgniko potchipenba rim·ahachim ine nikna man·a.
Indake ong·engon, ia me·chik bi·sa sakgniko drae til·ekgipa manderangara mongsongbate Assam a·dokni Salmara a·jao donggipa manderangsa ong·na nanga ine chanchichipengani gimin dos dakgipa manderangko rim·e on·na gita Assam-ni CM aro Police department ku·rachakaniko on·ataha ine Marak parakataha.
“Chenga Benga Mela-o a·sel ong·gipani bidingo seatgipa chittina Assam-ni CMO aro Assam-ni DGP Grievances Cell aganchakaniko on·ataha. Ia a·sel ong·anio jak donggipa manderangara, mela-ona ong·gija dakna miksonge re·bagipa Salmara a·jani manderangsa ong·na nanga ine chanchichipengani gimin dos dakgipa manderangko rim·na Assam sorkari ku·rachakaniko on·ataha,” ine Marak parakataha.
A·dok damgnini simarango iandakgipa a·selrang bang·en ong·genchimoba bang·bata changon report ka·rongjani a·sel dos dakgipa manderang joke katna man·rongenga ine janapatengon, iandake kal·aka man·gipa manderangko mamingnaba kengija an·tangtangni sepangbatgipa police station-rangona re·bae FIR ka·china Tura-ni MDC didiataha.
