TURA: South Garo Hills a·jani Chokpot jolo donggipa buring damsaoniko police-rang, bobil dake chakatgipa manderangni dongnue donenggipa adita silchidarerangko Bristibar pringwalo man·aha.
Police-rangni u·iatani gitade, Chokpot police station-ni ning·o donggipa Chibokgre song sambaoniko police-rang, pong 340-na baten anti-aircraft gulirang baksana guli chipchakgipa bakos ge·briko man·aha.
Ia anti-aircraft silchidareara dakgrikani somoirango jet fighter-rangko gona jakkalgipa silchidaresa ong·achim aro ia biaponiko iandakgipa silchidareni gulirangko man·aniara namen aiao inmanbeani ong·ahachim.
“Chokpot police station ning·o donggipa Chibokgre songni buringo bobil dake chakatgipa manderang, guli bakosrangko dongnue donenga ine koborrangko man·soani Bristibar pringwalni 1:15 bajimango Chokpot-ni SDPO baksana Sadar-ni CI, Chokpot-ni OC aro gipin police-rang, dongnue donenggipa silchidarerangko sandina re·angaha aro pringni 3:27 bajimango uamang, Chibokgre buringo dongnue dongipa anti-aircraft gulirangko aro guli bakosrangko man·aha,” ine Police official-rang parakataha.
Batanggimin somoirangoba police-rang, East Garo Hills aro South Garo Hills a·jani dingtang dingtang biaprangoniko gitcham GNLA bobil dolni a·ningrango dongnue donanggipa silchidarerangko bang·en man·ahachim ine nikna man·a.
Adita salrangna skangsan, adita sak manderang GNLA-Regroup (GNLA-R) bobil dolko bikottaiaha ine social media-rango parakatahachim indiba police-rang, ia dolni bang·bata manderangkon rim·na man·ahachim.
GNLA bobil dol bon·angaonin Garo Hills-o tom·tomanirangko man·piltaiahachim.
