TURA: Bristibar attamo, South Garo Hills a·jani Chokpot jolo donggipa Rongdenggre songo, me·asa aro me·chik bi·sa sakgnini manggisiko bolo dingdee dongako man·aha.
Da·o dipet ia me·asa aro me·chik sakgnini siani a·selko tale ma·sikujaengoba, uamang sakgnian kae siakon ine police-rang chanchichipenga.
Koborko on·ani gitade, sianggipa me·asani bimingara Nikra D Sangma aro me·chik bi·sani bimingara Midanchi Ch Marak ong·achim.
Me·asade West Garo Hills a·jani Purakhasia jolo donggipa Badupara songoni ong·achim aro me·chikde Chokpot jolo donggipa Rongdenggre songonin ong·achim ineba kobor on·aha.
Ia chadambe sakgnini manggisiko man·ani ja·man post mortem ka·na gita Baghmara-ona ra·angaha.
