TURA: South Garo Hills a·jani Chokpot Block ning·o donggipa Wari Chorako nina re·angenggipa mitam manderang skatang jabolrangko galbaenga ine Garo Students Union (GSU) Chokpot regional unit parakatenba, ia biapo skatang jabolrangko galbajachina mikrakataniko on·ataha.
“A·chik a·songo damsa mingsingbegipa biap jekon Wari Chora ine mingachim, ia biapko nina re·angenggipa mitam manderang ua biapo chips bikilap aro plastic bottle-rangko skatang galramramengani gimin chinga GSU Chokpot regional unit-ni gita ia biapo skatang jabolrangko galjachina raken mikrakataniko on·atenga,” ine GSU Chokpot regional unit-ni general secretary Spensar R Sangma parakataha.
Ia biapko India a·songonisan ong·aigija, dingtang dingtang biaprangoniba nina re·batokenga ine janapatengon, ia biapo skatang jabol galako uamang nikanggenchim ong·ode ian jatna aro A·chik a·song gimiknan kratchabeani ong·enga ine Sangma parakataha.
“South Garo Hills a·jani ning·o Wari Chora-na agreba gipin mingsinggipa biaprang gnang jekai Redingsni Wari, Imilsang Dare, Abong Chigat, Tengte Rongrep, Patijora, Bandare, Rangtang Wari, Warima Wari, Rekman Dare, Gadak Nawepile Dare, Asim Dare, Dombe Wari, Renang Dare, Tepota Dare aro uandakgipa biaprangba donga. Ia biaprangko a·doko songdong a·chaenggipa manderangna agreba dingtang dingtang biaprangoniba nina re·batokenga. Ia biaprangko nina re·baengon, ia biaprango chips bikilap aro plastic bottle-rangko skatang galanichi nitogipa biaprangko nosto ong·atenga, uni gimin iandakgipa nitogipa biaprangko nina re·bagenchim ong·oba skatang jabolrangko galpajachina sakantikon mol·molatenga, maina ia plastic-rangara rongtalgipa aro nitobegipa biaprangko nosto ka·an baksana nitoanikoba komiata,” ine GSU Chokpot regional unit-ni general secretary parakataha.
Chokpot block-ni ning·o mingsinggipa biaprangko rongtale aro ripinge rakkiangna gita GSU, songni manderang aro songni dilgiparang baksa tom·aniko dakenba gital niamrangko ru·utgijan parakatgen ineba Sangma u·iataha.
“Uni gimin, je manderangan ia biaprangko nina gita re·angengachim uamang sakantikon rongtal an·talaniko rakkichina aro skatang jabolrangko galjachina gita didiatenga,” ine GSU Chokpot regional unit-ni general secretary parakataha.
