SHILLONG: MLA aro MP-rangni kosako bangki dongenggipa case-rangni bidingo Meghalaya High Court, Mongolbar salo hearing-ko dakangaha.
Mongolbar salo, District & Sessions Judge-ni office-oni u·iatani gitade, East Khasi Hills a·jao MLA aro MP-rangni kosako ka·gipa mingbri case-rang bangki dongkuenga.
Indake ong·genchimoba skang on·gipa report-ni bidingo am·sandianirangko dakon, Special Judge (PMLA)-ni Court-o Section 45 PMLA Act-ni ning·o ka·gipa Complaint Case-ba dongkuenga aro iani bidingo da·o dipet maming u·iatanirang dongkujaenga ine ma·sina man·aha.
Unbaksana sorkarini ukil R Colney-ba West Jaintia Hills a·jao mingsa case bangki dongkuenga aro iani bidingo da·o sakkirangko sandienga ine u·iataha.
Ia case-rangni bidingo da·o ong·enggipa obostarangko, East Khasi Hills a·jao donggipa District & Sessions Judge-oniko sing·sandie ra·china gita Registry-na ge·etaniko on·ataha.
MLA aro MP-rangni kosako ong·enggipa case-rangni bidingo report-ko on·china gita iana skangsan Meghalaya High Court, a·ja ge·antini District & Sessions Judge-rangna ge·etaniko on·atahachim.
Indake ong·engon, Supreme Court-ni tik ka·gimin gita MLA aro MP-rangni case-rangko bon·atna ine dingtangmancha High Court, ‘Suo Motu’ case-ko ka·angaha.