SHILLONG: Election-na tom·anirangko ong·atanio manderang bang·e bakko ra·aiani giminde election-o chegen ia katta ong·ja ine United Democratic Party (UDP) parakataha.
“Political dolrangni election-na tom·anirangko ong·atanio manderang bang·e bakko ra·aianichide election-ko chena man·gen ong·ja. Election-ko chena gita komibeoba lak 2.5 vote-rangkode man·telna nanga. Election-na tom·anirangko ong·atanio manderang bang·e bakko ra·ahani gimin chegipa ong·gen ine darangba aganna man·ja,” ine a·dokni Cabinet Minister aro Khliehriat constituency-ni UDP MLA Kyrmen Shylla aganaha.
Shillong Lok Sabha seat-ko Voice of the People’s Party (VPP) chegen ine a·kangtokengani gimin ua ia kattarangko aganaha.
UDP-ni tom·anirango bang·bata manderangan bak ra·pana man·jagenchimoba uamang UDP-na ka·saskaa ineba Shylla aganaha.
“Manderang chingna ka·saani gimin chinga uamangni ka·saanichin mikkangchiba election-rango susana ka·dongataniko man·enga,” ine ua aganaha.
Lok Sabha election-o UDP-ni cholrangni gimin janapatskaengon, da·o dipet election-ni result-ko agansona man·kujawa ine UDP-ni Cabinet Minister aganaha.
“Anga bebera·a je dol ba candidate-an ia election-o chegipa ong·genchim, uan manderangna kam ka·aniosa pangchake ong·gen,” ine Shylla aganaha.
“Chea chegijanide chingni jako ong·jaha indiba chinga rakbee kamrangkode ka·aha. Chingni pilak MLA-rangan bil gimikchi kamko ka·aha indiba dilgipako seokanide manderangni jakosajok. Sawa aro maini gimin chegen ukode agansona man·jawa,” ineba ua aganaha.
Election-ni somoio dingtang dingtang political dolrang, manderangna ku·rachakanirangko dakgenchimoba dilgipako seokanide manderangni jakosa ong·aia ineba UDP-ni dilgipa parakataha.