TURA: Tura jillani pilak gittimrangon chirangko chu·onga gita man·jaengani a·sel neng·nikanirangko chagrongna nangtokengani gimin Tura Municipality area-ni ning·o donggipa car wash servicing centre ba gari su·galgipa dokkanrangko antio changgni dake, chong·motan Sombar aro Bristibar salgnisan kulichina aro servicing centre-rango bore well-rangko jakkaljachina gita West Garo Hills a·jani District Magistrate ge·etaniko on·ataha.
Ia sal somoirango china neng·nikanirangko man·tokna nangengani gimin noktangtango aro gittimtangtango chi ripingani cholrangko ra·gatchina aro sambao donggipa chiring chibisikrangko moila ong·atjana gita iandakgipa biaprango garirangko su·galjachina gitaba West Garo Hills a·jani District Magistrate ge·etaniko on·ataha.
Iani bidingo West Garo Hills a·jani District Magistrate, Section 144 CrPC-ko ra·gataha ine u·iatengon, ia niam Tura Municipality ning·osan ong·aigen aro ia niam May-ni 15 tarikona ong·anggen ine parakataha.