BOKO: Lok Sabha election-ni gittamgipa bako, Assam a·dokni dingtang dingtang A·chik dolrang, Congress dolna chakpaaniko on·na tik ka·angtokaha.
Iani bidingo Sukrobar salo, Assam-ni dingtang dingtang A·chik dolrang jekai, Garo National Council (GNC), Garo Women Council (GWC), Garo Youth Council (GYC), Garo Autonomous Council Demand Committee (GACDC) aro Boko-Chaygaon Assembly Constituency-ni ning·o donggipa Santipur songni dingtang dingtang dolrang, press conference-ko ong·atangenba, kobor ra·timgiparangna parakataha.
GNC-ni advisor Franklin Sangma, kobor ra·timgiparangna talataniko on·angengon, Assam a·doko songdongenggipa A·chikrangni man·na nangenggipa dingtang dingtang neng·nikanirangko janapatenba, ia change Assam a·dokni A·chik dolrang, Congress dolnan chakpaaniko on·na tik ka·aha ine parakataha.
Sangma-ni parakatani gitade, Assam a·doko songdongenggipa jatrangoni A·chikrangba jelbatsranggipa jatrangoni dolsa ong·engachim indiba A·chikrangni neng·nikanirangko BJP sorkari namatna gisiko nangjaengani gimin adita salrangna skang, dingtang dingtang A·chik dolrang tom·e chanchirimangenba, ia chang election-ode Congress dolna kamko ka·skana ine tik ka·angaha.
“Uni gimin May-ni 7 tariko ong·atenggipa Lok Sabha election-ni bon·kamgipa bako chinga Assam-ni A·chik dolrang, Indian National Congress (INC) aro INDIA alliance-na chakpaaniko on·skagen,” ine Sangma parakataha.
Assam aro Meghalaya a·dokni simarangko nipiltaianio Assam a·dokni bang·a A·chik songrangan neng·nikanirangko chagrongna nangtokenga ine GNC-ni president Enindra Marak parakatskaaha.
Boko-Chaygaon aro West Goalpara Assembly constituency-rangko adita salrangna skangsan Scheduled Tribe (ST) Reserves constituency dake parakmanahani gimin ian A·chikrangoniba Assam-ni Assembly-o aro Panchayat-rango jatni ku·rangko on·na gita jattangni dilgipako seokna chol ong·engaha ineba Marak parakataha.
BJP dol, India a·songni niam bidik aro Election Commission-ni niamrangko mande ra·jaenga ine matnangatengon, BJP-na kam ka·enggipa manderang, songni me·chikrangna form-rangko suale BJP-na pu·onchina gita didienga indiba ian Model Code of Conduct (MCC)-ko pe·ani gita ong·enga ine GNC-ni advisor Franklin Sangma parakataha.
Maini gimin A·chikrang BJP-na chakpaaniko on·jaenga ine sing·anina aganchakaniko on·angskaengon, BJP-ara Kristian aro gipin chonchongipa toromni manderangko dokkol ka·gipa dolsa ong·a indiba Congress dolde India a·songo songdongenggipa pilak jat aro toromni gisepo mikkang niteani grigipasa ong·a ine Sangma parakataha.
Lok Sabha election-ni gittamgipa bako, Assam-ni lak 1.3 A·chikrangba dilgipako seokanio bak ra·angna gita siengachim.
