TURA: Garo Hills-o medical seat-na All India National Eligibility cum Entrance Test (NEET)-ko sena sienggipa candidate-rangna porikka sechakani centre-ko sualanio adita jajaanirang ong·katahani gimin West Garo Hills a·jani Deputy Commissioner Jagdish Chelani, talataniko on·china gita National Testing Agency (NTA)-na sedoataha.
Iani bidingo kenjagokjachina gita Garo Hills-ni candidate-rangko didiatengon, “Mitam candidate-rangna Exam Centre Code-ko 330502 (Montfort Tura) ine janapahaoba mitamrangnade ia apsan Centre Code-kon Montfort Khanapara ine janapskaaha. Ian sesretaniba ong·ani cholrang dongaia aro iani bidingo anga talataniko on·china Delhi-ona sedoataha. Uni gimin da·o dipet Montfort Khanapara-ona re·na gita tarikujachina anga candidate-rangko didienga. Iani bidingo an·ching bakan tale ra·na man·gen,” ine Deputy Commissioner parakataha.
Garo Hills-o NEET porikkako sena sienggipa candidate-rang, Tura centre-kon skanggipa aro Shillong-ko gnigipa dake seoktokahachim. Ia bilsio NEET porikkana dingtangmancha Tura-ni Montfort Centre for Education-koba seokahani gimin ian candidate-rangni gisepo adita jajaatanirang ong·katskaahachim.