TURA: West Garo Hills a·jani Selsella jolrango niam gri bol-wa·a badingani aro den·anirangchi manderangna aro samtangtango ong·telaigiparangna nangchakeanganiko ra·baengahani gimin iandake niam gri bol wa·a badingani aro den·aniko ta·raken champengatchina gita Selsella-ni FKJGP, GSU aro ASWA dolrang, West Garo Hills a·jani Deputy Commissioner-ko didiataha.
“Selsella jolrango niam gri bol wa·a badingani aro den·anirang batroroengani gimin chinga namen jajrengchakenga maina ian samtangtango ong·telaigiparangnasan ong·aigija manderangnaba nangchakeaniko ra·baenga. Permit-rangko ra·chenggija aro samtangtango ong·enggipa obostarangko nichenggija skatang bol wa·arangko den·enganichi a·a rurongani, buring bolgrimrangni porongrong ong·ani aro pilakni gitan nangchakeaniko ra·bana man·a,” ine Selsella-ni dolgittam NGO-rang parakataha.
Selsella jolrango niam gri bol wa·a den·ani aro badinganiko ta·raken champengatchina Deputy Commissioner-ko didiatengon, iandakgipa kamrangko champengatanio dakchakanirangko nanggenchimode uamang dakchakna gita kusi ong·aigen ine dolgittam NGO-rang parakataha.
Iani bidingo District Administration maming ja·kurangko de·jagenchimode, Selsella jolrango niam gri bol badingenggipa aro bol wa·a den·enggipa manderangni kosako an·tangtangan ja·ku de·na draatako man·gen ineba Selsella-ni FKJGP, GSU aro ASWA dolrang mikrakataniko on·ataha.
