SHILLONG: Batanggimin chang Lok Sabha election-rango Shillong parliamentary seat-ko Congress cheahaoba ia changode dingtanganiko nikna siengaha ine United Democratic Party (UDP) ka·dongchakenga.
“Shillong parliamentary constituency-ni ning·o dam 36 Assembly constituency-rang dongani gimin chingni hisapanio neng·nikanirangko man·enga. Unbaksana bang·bata manderangan parakgija pu·ongiparangsa ong·a,” ine UDP-ni working president aro a·dokni Cabinet Minister Paul Lyngdoh aganaha.
“Indake ong·genchimoba, ia chang Shillong parliamentary seat-o dingtanganide dongtelgen. Shillong parliamentary seat-ko jeba cheangchina indiba ua Meghalaya a·dokni nanganirangko a·songni gadangona ra·angna man·na nanga,” ineba Lyngdoh aganaha.
Ia seat-ko jeba chena man·aigen ineba ua agantaiaha.
Tura Lok Sabha constituency-ni bidingo janapatskaengon, “Angni ripengskarang baksa golpogrike ma·siani gitade, Tura seat-ko dolgnini gisepo jeba cheani cholrang dongaia,” ine Lyngdoh aganaha.
Shillong parliamentary constituency-o UDP aro HSPDP dolrangni nangrime bikotgipa Regional Democratic Alliance (RDA), HYC-ni gitcham president Robertjune Kharjahrin-ko susaatahachim ine nikna man·a.
Shillong Lok Sabha seat-ko VPP, lak 1-na batgipa vote-rangchi chegen ine a·kangskaengachim.
Tura Lok Sabha seat-ko batanggimin chang election-rangko National People’s Party (NPP) altuen chena man·ahaoba ia changode Congress dol baksa bilakbee susagrikskana nangahachim aro ia seat-ko chepiltaigenchimode bang·gija vote-rangchisan chena man·aigen ine agantokskaengachim.
