SHILLONG: Shillong Polytechnic-o Civil Engineering-ko poraienggipa Tura-ni chatri saksa Sombar pringo, an·tangni dongchakenggipa hostel-o so·ote siaha.
Ia chatriara, Tura Dakopgre joloni bilsi 24 ong·gipa me·tra ong·achim aro ua Shillong Polytechnic-o Civil Engineering-ko 4th Semester-o poraiengachim.
Kobor on·ani gitade, uni sigimin manggisiko Shillong Polytechnic-ni hostel-o apsan dongrimpaenggipa gipin chatrirangsa, kelkini silo dingdee dongako nikchengaha aro ja·mano uamang hostel-ni warden-na kobor on·ataha.
Kobor on·timgiparangni u·iatani gitade, ia chatri an·tangko ba·rachi kae siaha.
Ja·mano hostel-ni warden aro Polytechnic-ni official-rang, ia a·selni bidingo Mawlai Police Station-na kobor on·ataha aro uandaken ja·mano ia chatrini manggisiko post mortem ka·na gita Shillong Civil Hospital-ona ra·angaha.