SHILLONG: Meghalaya a·doko, mongsongbate a·dokni skotong Shillong songjinmao, petrol bomarangchi godape so·sojengjeng ong·atanirangko nikna man·engani gimin ian a·dokni Tourism-na nangchakeaniko ra·banaba gnang ine Leader of Opposition (LO) ba Opposition dolni dilgipa Ronnie V Lyngdoh parakataha.
Batanggimin sal somoirango, sorkarini garirang, nokrang aro ma·manti gam-jinrangko nosto ka·na jotton ka·ahani giminba ua an·tangni suk ong·gijaniko parakataha.
Iandake so·sojengjeng ong·atani kamrangko ka·anichi tourism-na nangchakeaniko ra·baanisan ong·aigija ian chadamberangni janggi tangani cholrangkoba gimaatani gita ong·enga ine janapatengon, niamrangko skatang jaktango ra·jachina gita jingjengatenggipa chadamberangko Lyngdoh mol·molataha.
“A·doko so·sojengjeng ong·atani kamrangko ka·anichi batesa obostarang namjabatrorogen. A·doko iandakgipa obostarangko nikenga ong·ode maikai an·ching gipin biapni company-rangko a·doko invest ka·china didina man·gen,” ineba ua sing·doataha.
Iani bidingo toe janapatengon, Sohra-o Mawmluh Cherra Cement Limited (MCCL) kamrangko ka·jahani gimin Sohra-ni manderang, tourism-ni kamrangosa pangchake janggi tangna cholko sanditokskaengahachim ine Lyngdoh aganaha.
“Sohra-o manderang, homestay aro resort-rangko kulitokengachim indiba tourist-rangan a·dokona re·bajagenchimode uamangni kamrangara indin ong·gramaignok,” ine ua talataniko on·angaha.
Batanggimin sal somoirango petrol bomarangchi godape so·sojengjeng ong·atahani gimin an·tangni suk ong·gijaniko parakatskaengon, iandakgipa kamrangara, an·tangtangni nokdangrangko chalaina tourism-ni kamrango pangchakenggipa manderangnasa neng·nikanirangko ra·baskagen ine Opposition dolni dilgipa mikrakataniko on·angaha.
“Na·simang sorkarini kamrango kusi ong·jae iandakgipa kamrangko ka·enga ine anga ma·sia. Indiba an·ching an·tangtangni manderangni janggi tanganikode nangchakeatna nangja,” ine Lyngdoh aganaha.
Nanggenchimode jingjengatenggipa dolrangni pal uamangni seoke watatgipa dilgiparang sorkari baksa agangrikskana man·gen ineba ua aganaha.
“So·sojengjeng ong·atani kamrangko ka·anichi maming namgnirangkon man·jawa, uni gimin anga jingjengatenggipa chadamberangko name chanchie kamko ka·china mol·molenga,” ine Lyngdoh aganaha.
