TURA: West Garo Hills a·jani Chibinang songo, dolsa manderang, churi aro gol·dikrangko ra·bite, nokdang ge·sako chadrapeaha aro chadrapako man·e ia nokdangni me·chik saksako man·chape gimik sakbri manderang saknaanirangko man·na nangaha.
Koborko on·ani gitade, ia a·sel ong·ani re·anggipa Sonibar walo ong·aha aro ua somoio ia nokdangni manderang miattam cha·mitingchim.
Iani bidingo ia nokdangni manderang, police-rangna FIR ka·doangaha aro FIR-o parakani gitade, ua somoio sak 20-na baten manderang, ia nokona re·anggipa mande saksako dokna miksongesa ia nokdangko chadrapeahachim. Ia mandeko jokatna dakon ia manderang, nokdangni manderangkoba an·tangtangni ra·bitanggipa silchidarerangchi chadrapaha ine FIR-o parakataha.
“Ua somoio angani ripeng saksa miattam cha·na gita chingni nokona re·baaha aro chinga miattam cha·engmiting somoio sak 20-na baten manderang, chingni nokona napdrabaenba angni ripengko dokna a·bachengaha. Angni ripengko chinga jokatna jotton ka·on, uamang angni jikgipa, angni jonggipa aro angkoba dokaha,” ine police-rangna FIR ka·anio parakataha.
“Chingni dongchakgipa jolo changsaba iandakgipa a·selrang ong·a dongkujachim. Iandakgipa kamrangko ka·anichi jatgnini gisepo ding·chaogrikanikoba ra·bana man·gen,” ineba police-rangna badi ka·anio nokdangni manderang parakataha.
Iani bidingo ia nokdangni manderang, komibeoba saksni manderangni bimingko police-rangna FIR ka·gipao matnangataha.
Indake ong·engon, ia a·selni bidingo FIR-ko man·soani ja·man police-rang mokordoma ka·aha aro iani bidingo sandirokna gita a·bachengataha ine West Garo Hills a·jani SP Dara Aswaghosh janapatenba, da·o dipet iani bidingo darangkoba rim·na man·kuja ine parakataha.