SHILLONG: Garo Hills-ni dingtang dingtang biaprango Jal Jeevan Mission (JJM)-ni kamrangko name ka·ja ine matnanganirangko a·dokni PHE Minister Marcuise Marak jegalatenba, ia scheme-ni ning·o ka·gipa ming 4000 project-rangoni jekoba inquiry ka·e niaichina ine ra·biataha.
“Ia scheme-ni ning·o ming 4000-na baten project-rang donga, badia project-ko uamang inquiry dakna nangnikenga angna aganbo. Inquiry-ko dakchina anga department-na ge·etaniko on·aigen aro uni ja·man third party-chiba inquiry-ko dakna man·taigen. Indiba uamang re·bae badia project ba kamko inquiry dakna nangenga uko angna aganechina,” ine Mongolbar salo, PHE Minister kobor ra·timgiparangna aganaha.
Garo Hills-ni bang·bata biaprangon JJM-ni kamrang chu·sokjaenga ine matnanganirangko jegalatengon, ia scheme-ni kamrangko ka·anio maming dongnuanian dongjachim ine Marak parakataha.
Sorkarini see rakkianiko parakatani gitade, da·o dipet Meghalaya a·doko JJM-chi ge 5,04,021 nokdangrangna chi pipe-rangko sokate on·ahani gimin ia scheme-ni kamrang 77.38 percent matchotahachim.
JJM-ara a·songo pilak nokdangrangnan chi pipe-rangko sokate on·na ma·mong sorkarini ra·gatgipa mission ba kamsa ong·ani gimin namen transparent ong·gipa ba dongnua gri ong·gipa mission ba kamsa ong·a aro ia mission-o mamingkoba dongnue dakna man·ani dongja ineba Marak parakataha.
“JJM-ni ning·o dingtang dingtang bakrang donga aro badia bakko uamang chu·sokja ine matnangenga uko mesoke on·chengna man·ode nambatgen. JJM-ni payment-oba dakgualanina cholrang dongja indide maio pangchake uamang JJM-ni kamo ong·gija dakanirang donga ine matnangenga?” ine PHE Minister sing·doataha.
