SHILLONG: Ru·uta somoirangni ja·mano A·dok Sorkari da·o bon·kame Meghalaya State Commission for Women (MSCW)-ni Chairperson-na mandeko minge donna gita man·aha, jekon da·o Model Code of Conduct (MCC) matchota joljolan official gita parakatanggen.
“Chinga sulsul pilakna dakna nanganirangko ja·rikenba mandeko seoke donna man·aha, indakoba da·omiting MCC dongengani gimin bimingko parakatnade engtokjaenga,” Social Welfare Minister, Paul Lyngdoh Mongolbaro parakataha.
“Chief Minister-na namnika ba namnikgijako ra·na gita file-koba CM-ona watataha. Pilak dakgnirangkon matchotaha indake LS election-ni voter-rangko chane parakatani ja·mano seokgimin mandeni bimingko parakatgen,” aganaha.
Meghalaya State Commission for Women (MSCW)-o Chairperson donggijan ja chikking ong·nasipilengaha.
Chairperson-ni post, da·sikkari June 24-o Phidalia Toi-ni kamko wate katani ja·man intalan bangbang ong·ahachim.
Da·o gita chairperson ong·gipani term ba somoi-ba bang·ede ong·jawaha maina present body ba da·o ong·enggipa dolni term-an re·baenggipa December jaon matchotengaha.
Vice chairperson-ara Garo Hills-osa ong·ani gimin chairperson-ni daitoko ra·e kam ka·nade una namen neng·beani ong·achim.
