SHILLONG: Meghalaya a·doko Common University Entrance Test (CUET) porikkako ra·anio maiba neng·nikanirangko chagrongna nanggenchimode, iani bidingo am·sandichina gita ma·mong sorkarina u·iatgen ine Budbar salo, a·dokni Chief Minister Conrad K Sangma, ku·rachakaniko on·angaha.
CUET-de a·dok sorkarini jako ra·enggipa kam ong·ja ine talataniko on·angengon, ia porikkako ra·anio maiba jajrengchakna nanganirang donggenchimode a·dok sorkari, iani bidingo ma·mong sorkarina u·iataigen ine Chief Minister parakataha.
“Batanggimin chang NEET porikkako ong·atanio adita jajaanirang dongahaoba chinga ta·raken ma·mongni agency-rangna uiatenba, am·sandianirangko dakchina u·iataha aro da·o CUET porikkako ong·atanioba maiba neng·nikani ba jajana nanganirang donggenchimode chinga iani bidingo ma·mongni dolrangna u·iatchongmotgen aro nanga gita ja·kurangko de·china didiatgen,” ine Sangma aganaha.
A·doko CUET porikkako ra·anio da·o dipet ua maming badi ka·ani ba chatro chatrirangni neng·nikanirangko chagrongna nangani gimin kobor man·soa dongkuja ineba Chief Minister aganaha.
Chief Minister-ni aganani gitade, Meghalaya a·doko chu·onga gita centre-rang dongkujani giminsa batanggimin bilsigninade Meghalaya a·dokko CUET porikkaoniko ma·mong sorkari wataha indiba da·ode Shillong, Tura aro Jowai-o chu·onga gitan CUET centre-rangko man·aha.
NEHU course-rangko ra·na sienggipa college admission-nasa ia CUET porikkako ong·atenga ine talataniko on·angengon, “Iani giminsa Captain Williamson Sangma University-ko state university-ni dake taridapani ja·man da·o NEHU-o bak ong·enggipa pilak college-rangkon state university-ni bak ong·atna man·gnok aro ia state university-o bak ong·enggipa college-rangnade CUET porikkako sena nangjawaha,” ine Chief Minister parakataha.
Meghalaya a·dokoba skanggipa changna ia CUET porikkako Budbar salo a·dokni dam 26 centre-rango chatro chatrirang seangtokahachim.
Ia dam 26 CUET centre-rangoni dam 12-de Shillong-o, dam 9-de Tura-o aro dam 5-de Jowai-o ong·a.
Ia bilsio Meghalaya a·dok gimikni sak 18,422 chatro chatrirang, CUET-ko sena gita register ka·aha aro ia sak 18,422 chatro chatrirangoni sak 8,535-de Shillong-o, sak 4,269-de Jowai-o aro sak 5,618 chatro chatrirangde Tura-o sena gita register ka·ahachim.
Ia CUET porikkani result-rangko National Testing Agency (NTA), re·baenggipa June jani 30 tariko parakatna sienga.