SHILLONG: East Khasi Hills a·jani Ichamati aro Mawlai Mawroh-o mande so·otgiparangko somoi gita charge sheet ka·na man·na gita police-rang, ta·raken sandirokanirangko dakenga ine u·iataha.
Ia case-rangni bidingo sing·anina aganchakaniko on·angengon, “Ichamati aro Mawlai Mawroh-o adita sak manderangko so·otgipani bidingo police-rang da·oba sandirokanirangko dakengkua. Dongimin somoi gitan dos dakgipa manderangni kosako charge sheet ka·na man·na gita chinga chingni sandirokanirangko ta·rakatna jotton ka·enga,” ine East Khasi Hills a·jani SP Rituraj Ravi parakataha.
Re·anggipa March jani 27 tariko, Shella constituency-ni ning·o donggipa Ichamati-o gipin jat mande sakgniko so·otanina police-rang, Khasi Students Union (KSU)-ni bilsi 26 ong·gipa Mesadapbor Skhembil aro bilsi 26 ong·gipa Shanborlang Shati-ko rim·chengahachim. Uni ja·man ia a·selni bidingo police-rang, Nongthymmai-oni bilsi 27 ong·gipa Cleenstar Shabong-koba rim·ahachim.
Mawlai Mawroh-o nok rikgipa mande saksako so·otanina police-rang, Mawlai-oni bilsi 25 ong·gipa Gary Mawlieh-ko rim·skaahachim.
Indake ong·engon, 2023 bilsini September jao me·tra saksako Nongthymmai-o jinma drae til·ekanina police-rang, sakgittam manderangko rim·skaahachim.
Iani bidingo matnangako man·gipa manderangoni saksa, jean bilsi sokkugijagipa chadambe ong·achim, me·chikni kosako FIR ka·pangpilskaaha aro police-rang uni FIR-koba register ka·e da·o sandirokanirangko dakengaha ine SP parakataha.
