AMPATI: Meghalaya a·doko apalbatsranggipa fishery project, jekon ‘Toljawa Lake’ minga, ian South West Garo Hills a·jani Betasing C&RD Block ning·o donggipa Kumligaon songo donga.
Ia Toljawa Lake-ara ka·singipa buring bolgrimo donggipa chibol ong·e bilsigimikan ia biapo dingtang dingtang rokomni do·orangkoba nikna man·ronga.
Ia Toljawa Lake-ko jolni manderang ‘Kumali’ ineba minga aro ia chibolni apalaniara bigha 250-mang ong·a.
Ia Toljawa Lake-o ma·manti rokomni sam-bolrang aro pulrangkoba nikna man·a aro ian ia chibolko nitoatna dakchakaniba ong·skaenga.
Ia chibolni sambao chongipa a·tot donga, jekon songni manderang ‘Naribhita’ mite ine mingskaa. Ia mitean ia chibolko aro ia chibolo donggipa pilak jonturangkon nirokenga ineba songni manderang bebera·a.
Ia Toljawa Lake-ko ripinge rakkina gita Union Rural Development Ministry-ni ning·o ‘Amrit Sarovar’ scheme-ko ra·gataha. Ia scheme-ara chiring chibisik aro iandakgipa chibolrangko tangatpilna miksonge ma·mong sorkarini ra·gatgipa scheme ong·achim.
Ia Toljawa Lake-o na·tokrangko bariatna gitaba Fishery department, dingtangmancha na·tok bi·sarangko watmanaha.
Sin·karini salrang a·bachengahaon, ia Toljawa Lake-o dingtang dingtang rokomni do·orangko nikna a·bachengronga maina dingtang dingtang biaprango sin·ana kate chakgipa do·orang ia biapona bilbarongtokskaa.
Ia Toljawa Lake-ko nirokna gita dingtangmancha committee-koba songmanaha.
