SHILLONG: Garo Hills-ni simarang gita Bangladesh a·songona niam gri chini badingsrukanirangko a·dok sorkari champengna man·jaenga ine matnanganirangko daktokengon, Bangladesh a·songona chini badingsrukaniko nirok sandianide Customs aro Border Security Force (BSF)-ni kamsa ong·a ine a·dokni Cabinet Minister aro sorkarini ku·wattimgipa Marcuise N Marak parakatskaaha.
Bangladesh a·songona niam gri chini badinganiko champengna gita a·dok sorkari mamingkoba dakjaengama ine sing·anina aganchakaniko on·angengon, India a·songni chinirangko gipin a·songrangona badingataniara kraani ong·ja indiba BSF aro Customs-sa simarangko nirokna gita bil donggiparang ong·e Bangladesh a·songona niam gri chini badingsrukaniko nirok sandianide uamangni kamsa ong·a ine Marak parakataha.
Indake ong·engon, niam gri chini badingsrukaniko champengna gita a·dokni Chief Minister Conrad K Sangma ja·kurangko de·chakatmanaha ineba Cabinet Minister Marcuise Marak parakataha.
“Ia kamko champengna gita Chief Minister ja·kurangko de·chakatmanaha aro niamrang dongani gimin iandakgipa kamrang dongna nanga. Indiba simarangko nirokna gitade BSF aro Customs official-rangsa bil donggiparang ong·ani gimin chinga ia kamna uamangon pangchakenga,” ine Marak aganaha.
Chini badingsrukaniko a·dok sorkari nikja dake dongenga ine matnanganirangkoba ua raken jegalataha.
