SHILLONG: Meghalaya a·dokni autonomous district council (ADC)-rangara an·tangari chalaigipa bimangrangsa ong·ani gimin kajinarangko name chimongna aro kamrangko nambatatna man·na gita a·dokni damgittam ADC-rangkon nambate chalaichina a·dok sorkari ge·etaniko on·angaha.
Budbar salo, a·dokni damgittam ADC-rang baksa tom·aniko ong·atangenba, ia ADC-rangko nambate chalaichina a·dok sorkari ge·etaniko on·angaha.
Ia tom·anio ADC-rangni dingtang dingtang neng·nikanirangko chanchirimangengon, ADC-rangko chalaianio maikai tangka paisani gita bilakna man·gen aro kam ka·giparangko nirokna man·gen, uarangni giminba chanchirimangaha.
Ia tom·anio a·dokni Chief Minister Conrad K Sangma-ba bak ra·angengon, District Council-rango kam ka·giparangko rakkiani, service rules aro financial policy-rangko ra·gatna gita dingtangmancha committee-ko songaha aro ia committee-an ADC-rangni bangki dongkuenggipa Bill-rangko pass ka·na gitaba kamrangko ka·anggen ine parakataha.
ADC-rangko chalaianio neng·nikanirangko chagrongna nangengani gimin janapatengon, mitam district council-rango maming sanction gri kam ka·giparangko nangana bate rakkiahani a·selsa neng·nikanirangko chagrongna nangenga ine Sangma aganaha.
Bilsi bongana skang Garo Hills Autonomous District Council (GHADC)-o sak 2,500-mangni gita kam ka·giparang dongachim indiba da·ode kam ka·giparangko sak 1500-ona komiataha ineba Chief Minister parakataha.
JHADC-o sak 1200-mangoni sak 1400-mangona kam ka·giparang donga indiba KHADC-ode kam ka·giparang sak 800-na baten komibata ineba ua aganaha.
Batanggimin bilsi 5-6-ni gisepo ia damgittam ADC-rangon kam ka·giparangko rakkidapa dongkuja ineba ua aganaha.
Chief Minister-ni parakatani gitade, ia damgittam ADC-rangon kamrangko namdapatna a·bachengaha indiba dingtanganiko nikna adita somoirangkode nangkuaigen.