TURA: Dadenggre sub-division-ni sorkari LP skulrango, tol·e tarigipa certificate donggipa mande sakgnina skigipani kamko on·a ine matnangenggipani bidingo inquiry-ko dakna gita School Education & Literacy-ni Director Swapnil Tembe, membor sakgittam donggipa inquiry committee-ko songe on·angaha.
Ia a·selni bidingo songbadrango seatani ja·man School Education & Literacy-ni Director, inquiry-ko dakna committee-ko songe on·angaha.
Ge 192 bangbang ong·e dongenggipa kamrangna unreserved category-o sak 34 skigiparangko kamo ra·ani bidingo adita salrangna skangsan Salim Biswas aro Istiak Alom minggipa manderang am·sandianirangko dakon, kamo rakkiako man·gipa manderangoni komibeoba sakgni skigiparangde tol·e tarigipa certificate-rang donggipa manderangsa ong·a ine ma·sina man·ahachim.
Iani bidingo kobor ra·timgiparangna parakatengon, ia skigipa sakgni baksana gipinrangba dongkuengnaba gnang ine Biswas aro Alom janapatahachim.
Indake ong·engon, iani bidingo songbadrango seaniko niksoani ja·man iani bidingo talbate ma·sie ra·na man·na gita membor sakgittam donggipa committee-ko songe inquiry-ko dakchina Education official ge·etaniko on·ataha.
Ia committee-ko West Garo Hills a·jani District School Education Officer dilgen aro ia committee-o Tura aro Ampati-ni SDSEO-rang donggen ineba u·iataha.
Ia inquiry committee-ni membor-rang, rim·a man·gipa mande sakgni baksana kamna seokako man·gipa pilak candidate-ni lekkarangkoba nipilanggen.
Ia inquiry report-ko sal 25-ni gisepon on·china gitaba School Education & Literacy-ni Director, ia sakgittam membor donggipa committee-na ge·etaniko on·ataha.
