TURA: Wachi kari sokbaengahani gimin West Garo Hills a·jao tarisamsoanirangko nipilna gita Sukrobar salo, District Coordination Committee (DCC)-ni tom·aniko Tura-ni DRDA Conference Hall-o ong·atangaha.
Ia tom·aniko West Garo Hills DRDA-ni Project Director Dolrich BG Momin dilangaha aro tom·anio dingtang dingtang Block-ni Block Development Officer (BDO)-rang aro dingtang dingtang department-ni officer-rangba bak ra·angtokaha.
Ia tom·anio wachiona tarisamsona nangengani gimin chanchirimangengon, Sub-Division aro Block-rango tom·anirangko ong·ate tarisamsochina, department ge·antion nodal officer-rangko songchina, officer-rangni gisepo agangrikani cholrangko bikotchina, district, sub-divisional, block aro municipal-rangni Whatsapp Group-rango mongsonggipa manderangko rimnapchina, Home Guard, SDRF, Fire & Emergency-rango sipairang chu·onga gita dongama dongja aro uandakgipa dingtang dingtang kamrangni bidingo chanchirimangaha.
Chi banani aro a·arang be·anirango nanga gita kamrangko ka·ani, nokrang aro bagan barirang nosto ka·ako man·on konta 24-ni gisepon FIR-ko ka·na nangani giminba ia tom·anio official-rang chanchirimangaha.
