SHILLONG: Umiam dolongko tarienggipao traffic-ko name dakna man·jani a·sel manderangna neng·nikanirangko ra·baenga ine Sonibar salo United Democratic Party (UDP) matnangataha aro traffic niamrangko rakbatatchina sorkariko mol·molangaha.
“Niamrangko donangaha ine agangenchimoba kam nong·jaenga aro manderangko konta 3-rangna sengdade dongna nangenga jeon bilongen neng·nikaniko man·enga. Anga an·tangba sengdadna nangaha aro anga traffic name jarikgijaniko nikangna gita man·aha,” UDP-ni general secretary Jemino Mawthoh aganangaha.
Ian bilongen chanchina nanggipa ong·enga jeon manderang dingtang dingtang biaprangoni re·anga aro re·baa dakenga jekai Guwahati-ona rel gari, sildoreng, hospital-ona re·angiparang donga aro ian dal·begipa neng·nikani ong·baengaha ien Mawthoh aganaha.
“Dolongko tarienga inen chingaba ma·sia indiba nang·nikaniko chagrongenggipako altubatatna an·ching bang·bate kam ka·na nangenga jedakode neng·nikaniko namatna man·gen, ine ua agandapangaha.
Ramao chinrangko dongenchimoba maidake bang·a manderang garirangko batseksekangenga aro ian dolgipinko champenga gita ong·atengaha ine Mawthoh agandapangaha.
Anga an·tangde jemangan gari batsekseke salbaenggiparangko dondipata aro traffic niamrangko jarikchina uamangko agan-skie on·a,” ine ua agandapangaha.
Dolgnichipakoniko minit 15-na dondipatenga jeon dolsako dondipatenga aro dolgipinko watatenga, ine u·iatgipao aganangaha, indiba ong·a a·solmanchade manderang dolongona sokna jean km 2-mangmangko batsotna konta 3-rangni gita sengdade dongna nangenga.
Aro mingsa neng·nikatani songreenggiparang rama rikamrango serabera dake jabolrangkoba galangengko ine UDP General Secretary jaksi ote mesokangaha.
“Ia rama konta 3-4-rangna jachange dongani rama gita ong·engaha kam ka·ani kontrangko gimaatani gimin chanchibo, neng·nikanikode manderang chagrongengaha. Manderangni neng·nikaniko namatna jedakgipa rakgipa niamrangko ra·gatna nanga,” ine ua agandapangaha.
