TURA: East Garo Hills a·jani Dawa Gittinggre aro Nengsep Gittimo Jal Jeevan Mission (JJM)-ni kamrangko matchotaoni jagni ong·pilengahaoba da·onan songni manderang chi tingtotsakoba man·kujaenga ine Williamnagar-ni saksa Nilbath Ch Marak matnangatenba, iani bidingo ta·raken am·sandianirangko dakatchina PHE department-ko didiataha.
Iani bidingo ia song damgnio songdongenggipa manderangni pal, PHE-ni Executive Engineer-na badi ka·e sedoatengon, ia song damgnion JJM-ni kamrangko matchotahaoba songni manderang jagni ong·pile chirangko man·tokkujaenga ine Marak matnangataha.
Marak-ni parakatani gitade, JJM-ni kamrangko matchotani ja·man pangna dakrongbewal gita ia song damgnioba JJM-ni kamrangko taripilna aro nanga kamrangko ka·na gita PHE department, mande sakgniko songe donahachim indiba ia manderango songni manderang sing·sandiahaoba, uamang maming aganchakanirangko aro dakchakanirangko on·skakujaengachim.
Ia song damgnion chirangko salna gita PVC rubber pipe-rangkosa jakkalaha ine matnangatskaengon, ia rubber pipe-rangko a·ning gita ra·ani pal bangbang gitasa ra·skaaha aro ian salni ding·anichi bakan nosto ong·pilna man·aigen ine Marak parakataha.