SHILLONG: Meghalaya a·dokni police-rang, manderangni kosako ka·namgija dake mesokenga ine manderangni chanchianiko dingtangatna gita a·dokni gital Director General of Police (DGP) Idashisha Nongrang, ku·rachakaniko on·angaha.
A·dokni gital DGP ong·e kamko jako ra·angani ja·man kobor ra·timgiparang baksa agangrikengon, Meghalaya a·dokni police-rang, manderangni kosako ka·namgija dake mesokronga ine manderangni chanchianiko dingtangatanian una mongsongbatgipa ra·biani ong·gen ine Nongrang aganaha.
Manderangko dakchaknasa aro manderangko dokkol ka·e ronade police-rang kamko ka·jaenga ine talataniko on·angengon, gisepgrikode ua an·tangko grongna gita manderangna cholko on·gen aro uko grongna sikgiparangde jeba uko grongna man·aigen ine gital DGP parakataha.
“Angko grongna sikgiparang jeba angko grongena man·aigen aro anga uamangni neng·nikanirangko knatimna somoiko on·gen,” ine ua aganaha.
Meghalaya Police-o ka·dongchakna man·ani aro parak ong·ani gimin sing·on, a·dokni police-rangkode namgipa bewalnan mingsingtoka aro ian a·doko songdongenggipa manderangni bewal ong·a ine Nongrang parakataha.
Meghalaya Police-ni dol 12 sipairangko adita salrangna skang, election-ni kamna dingtang dingtang biaprango donatani somoio mittelpiltokahani gimin ua ia kattarangko aganaha.
“Constable-ni gadangosan ong·aigija officer-rangni gadangoba chinga adita namdapatanirangkosan dakna nangkuenga,” ine ua aganaha.
Tangka dabie ra·anio HNLC bobil dolde jak dongja ine a·kanganirangko police-rang sandirokengkua ineba gital DGP parakataha.
Shillong songjinmao bading chiwale cha·enggipa bang·a manderangnan HNLC, tangka dabiani chittirangko on·ataha ine matnanganirangko knana gita man·ahachim indiba iandake matnanganirangko HNLC bobil dolde jegalatskaenba, uamangde iandake tangka dabie ra·anio jak donggiparang ong·ja ine talataniko on·atskaahachim.
Indake ong·engon, Shillong songjinmao so·sojengjeng ong·anirangko namatna gita Meghalaya Police, rakbate kamrangko ka·gen ineba Nongrang ku·rachakaniko on·angaha.
