SHILLONG: North Eastern Hill University (NEHU)-o marking system-ko da·o re·baenggipa jadokni gisepon a·bachengatnaba gnang ine NEHU Students Union (NEHUSU)-ni general secretary Banpynbiang Riang parakataha.
Iani bidingo kobor ra·timgiparang baksa agangrikengon, da·o dipet marking system-ko a·bachengatna gita nipiltaianirangko dakkuengani gimin ta·rakede a·bachengatna man·kujaenga aro iana NEHU-ni dilgiparang suk ong·gijaniko parakaha ine Riang aganaha.
Indake ong·genchimoba, chatro chatrirangna mark-rangko on·anio ka·sachakanirang dongchina gita NEHU-ni Board of Examination (BOA), skigiparangna ge·etaniko on·aha ine NEHUSU-ni general secretary parakatskaaha.
Riang-ni parakatani gitade, NEHU-ni mark on·ani a·selsa chatro chatrirang komia mark-rangko man·enga aro ian chatro chatrirangni seng·ani ba u·ianirango pangchakja ine NEHUSU chanchichipenga.
Indake ong·engon, NEHU campus ning·o Wi-Fi-na neng·nikani aro uandakgipa NEHUSU-ni dingtang dingtang dabianirangkode university-ni dilgiparang chu·sokatna man·aha ine NEHUSU-ni general secretary parakataha.
NEHU-ni hostel-rangko man·chape campus ning·o mitchigipa chirangko on·anikode university namatna man·aha ineba Riang aganaha.
NEHU-ni chatro chatrirangna antini bon·ao bus garirangko on·china dabianikoba NEHU-ni dilgiparang chu·sokatna man·aha ineba ua aganaha.
