TURA: Re·baenggipa May 31 tariko a·gilsak gimikon ‘World No Tobacco Day’-ko manina siengon, ia salko manisamsoani bak gita Tura-ni Nivedita Senior Secondary School-ba dingtangmancha ta·makku jakkalani namgijanirangko manderangna mikrakatna gita jinma re·jomaniko aro signature campaign-ko ong·atangaha.
Ia re·jomaniko pring 10:00 baji dipet skul campus-oni a·bachengataha aro re·jomanio skulni chatro chatrirang aro skigiparang gimik sak 200-mangni gita bak ra·angtokaha.
Jinma re·jomaniko skuloni bazaar ramarang gita ong·atenga ja·mano skulon matchotateaha aro re·jomengmiting somoio chatro chatrirang, ta·makku jakkalani namgijanirangko segimin lekka pal·takrang aro banner-rangkoba ra·bittokaha.
Re·jomengmiting somoio chatro chatrirang, dingtangmancha signature campaign-ko dakangjolaha aro ta·makku jakkalaniko jegale manderangni soirangkoba ra·angaha.
Ia re·jomaniko aro signature campaign-ko ong·atna man·ahani gimin Nivedita Upper Primary Section-ni Headmistress Pallabi Saha-ba mittelpilaniko parakataha.
