TURA: Gital dake taridapenggipa Tura Civil Hospital-ko Bristibar salo, a·dokni Chief Minister Conrad K Sangma niangaha aro hospital-ko niangani somoio nanganirangkoba ua doctor-rango sing·e sanne ra·angjolaha.
Tura Civil Hospital-o taridapanirangko niangengon, adita salrangna skang kuligipa CATH lab-o surgery dakgipa manderangkoba Chief Minister grongangaha aro ia manderangko surgery dakanio chu·sokahani gimin ua hospital-ni management aro doctor-rangkoba mittelpilangaha.
Hospital-ko nina re·angani somoio doctor-rang, Tura Civil Hospital-o ka·tong sagiparangna dingtangmancha gital critical care unit-ko kulina nangengani gimin aro dingtang dingtang unit-rango paramedic, technician aro gipin kam ka·giparangko nangdapkuengani giminba Chief Minister-na u·iataha.
Ia hospital-ona re·ange doctor-rang baksa tom·aniko ong·atangani ja·man kobor ra·timgipa manderang baksa agangrikengon, “A·doko sanna banani cholrangko namdapatanian a·dok sorkarini mongsonggipa kam ong·enga aro a·dokni manderangna nambata sanna bananirangko on·na man·na gita sorkari, dingtang dingtang hospital-ni management-rang baksa agangrikjringenga,” ine Chief Minister parakataha.
Garo Hills-o cardiology kolrang dongjani a·sel skangode manderang ka·tong saanirangko sanna gita Guwahati songjinmarangonasa re·angna nangachim indiba da·ode Tura Civil Hospital-o CATH lab-ko kuliahani gimin manderang biaptangon donge sanna bananirangko ra·na man·engaha ineba Chief Minister aganaha.
